Chernogoriya o‘zbekistonliklar uchun vizasiz rejimni bekor qildi

Chernogoriya hukumati O‘zbekiston fuqarolari uchun vaqtinchalik vizasiz rejimning to‘xtatilishini e’lon qildi. Bosh vazir Miloyko Spaich raisligida 9-oktabr kuni bo‘lib o‘tgan Vazirlar Mahkamasining 98-sessiyasida qabul qilingan bu qaror Armaniston va Misr fuqarolariga ham taalluqlidir.

Bunday qadamning rasmiy sababi - Chernogoriya intilayotgan Yevropa Ittifoqi talablari bilan mamlakat viza siyosatini uyg‘unlashtirish zarurati. Hukumat bayonotida ta’kidlanishicha, ushbu chora 2024-2027 yillarga mo‘ljallangan islohotlar dasturi doirasidagi majburiyatlarning bir qismi bo‘lib, Yevropa Ittifoqiga a’zo bo‘lish bo‘yicha muzokaralarning adliya, erkinlik va xavfsizlikka oid 24-bobining mezonlariga mos keladi. "Qabul qilingan o‘zgartirishlar... Chernogoriyaning Yevropa Ittifoqiga to‘laqonli a’zo bo‘lishga sodiqligidan aniq ishora beradi", - deyiladi xabarda.

O‘zbekiston fuqarolari uchun vaucher mavjud bo‘lganda turistik maqsadlarda Chernogoriyaga tashrif buyurish imkonini beruvchi mavsumiy vizasiz rejim 2023 yildan beri amalda edi. Bu qadam, xususan, "Uzbekistan Airways"ning kurort shahri Tivatga to‘g‘ridan-to‘g‘ri aviaqatnovlari yo‘lga qo‘yilishiga yordam berdi va Bolqon yo‘nalishini o‘zbekistonlik sayyohlar orasida ommalashtirdi. Turistik mavsumdan tashqari vaqtlarda kirish uchun avval ham Moskvadagi Chernogoriya elchixonasi orqali viza olish talab etilardi.

Rasmiy Toshkentning munosabati darhol bildirildi. Tashqi ishlar vazirligi matbuot kotibi Ahror Burhanov jurnalistlar so‘roviga javoban, dastlab TIV vaqtinchalik vizasiz rejimning bekor qilingani haqida ma’lumotga ega emasligini ta’kidlagan edi. Uning aniqlik kiritishicha, kelishuv turistik mavsum davomida amal qilgan va bu yil 1-martdan 1-noyabrgacha davom etgan. Endilikda Chernogoriyaga har qanday safar uchun O‘zbekiston fuqarolariga viza rasmiylashtirish talab etiladi.

Shuni ta’kidlash joizki, O‘zbekistonning o‘zi 2019-yil fevral oyida Chernogoriya fuqarolari uchun 30 kungacha respublikada bo‘lish imkonini beruvchi vizasiz rejimni joriy qilgan.

Chernogoriya hukumatining qarori Yevropa integratsiyasi jarayonini tezlashtirish uchun o‘z qonunchiligini Yevropa standartlariga muvofiqlashtirish bo‘yicha kengroq strategiyaning bir qismidir. 2010 yilda Yevropa Ittifoqiga a’zo bo‘lish uchun nomzod maqomini olgan Chernogoriya G‘arbiy Bolqon davlatlari orasida ushbu jarayonda yetakchilardan biri hisoblanadi.

Nomzod mamlakatlarning viza siyosatini Yevropa Ittifoqi siyosati bilan uyg‘unlashtirish jarayoni standart talab hisoblanadi. Bu ko‘pincha Shengen hududiga kirish uchun vizaga muhtoj bo‘lgan uchinchi mamlakatlar fuqarolari bilan avval amalda bo‘lgan vizasiz rejimlarning bekor qilinishiga olib keladi.