Gollivud keyinga qoldirildi: nima uchun rossiyalik prodyuser O‘zbekistondagi suratga olish ishlarini bekor qildi?

Rossiyalik prodyuser Leonid Xromovning O‘zbekiston hududida Gollivud qisqa metrajli filmini yaratish rejalari amalga oshmaydigan bo‘ldi. Loyiha bir necha sabablarga ko‘ra bekor qilindi, ularning asosiysi - belgilangan byudjetni qoplashga tayyor bo‘lgan mahalliy homiylarni topishning imkoni bo‘lmaganligi. Bu haqda Xromovning manfaatlarini ifodalovchi O29 Production prodyuserlik kompaniyasi xabar berdi.

Olti daqiqalik filmni amalga oshirish uchun kamida 80 ming dollar miqdorida mablag’ talab qilingan, bu esa qisqa metrajli format uchun juda katta sarmoyadir. Xorijiy kinokompaniyalarning O‘zbekistonga suratga olish maydonchasi sifatida qiziqishi ortib borayotganiga qaramay, ushbu loyiha mahalliy darajada zarur moliyaviy yordamni ololmadi.

Qarorga ta’sir qilgan ikkinchi omil prodyuserning o‘zining ijodiy va strategik rejalariga tuzatishlar kiritilishi bo‘ldi. O‘zbekistondagi suratga olish ishlari o‘rniga Leonid Xromov Moskvada bir daqiqalik tizer yaratishga e’tibor qaratmoqchi. Bu ish 2025-yilning noyabr yoki dekabr oylarida bo‘lib o‘tishi kutilmoqda. "Menimcha, Gollivud tizerini suratga olish ancha kam xarajatlar bilan kattaroq iqtisodiy samara beradi", - deya prodyuserning o‘zi vaziyatni izohlab, yangi yondashuvning iqtisodiy maqsadga muvofiqligini ta’kidladi.

Nihoyat, loyihaning bekor qilinishining uchinchi sababi Gollivud aktyorlarini jalb qilish bilan bog‘liq logistik mulohazalar bo‘ldi. Prodyuserlik jamoasi, agar zarur byudjet topilgan taqdirda, suratga olish jarayonini Amerika Qo‘shma Shtatlari hududida tashkil etish ancha osonroq bo‘ladi, degan xulosaga keldi. Bu barcha amerikalik aktyorlar qisqa muddatli loyihalarda ishtirok etish uchun O‘zbekistonga uzoq parvozlarni amalga oshirishga tayyor emasligi bilan bog‘liq.

Shunday qilib, Markaziy Osiyoda Gollivud kinomahsulotini yaratish bo‘yicha ulkan reja noaniq muddatga qoldirildi. Leonid Xromovning qarori shuni ko‘rsatadiki, xalqaro kinoloyihalarni muvaffaqiyatli amalga oshirish uchun noyob joylar va madaniy rang-baranglikdan tashqari, hal qiluvchi rolni hamon moliyaviy qo‘llab-quvvatlash va suratga olish guruhining asosiy ishtirokchilari uchun logistik qulaylik o‘ynaydi.

2019 yilda O‘zbekistonda fransiyalik mashhur aktyor Jerar Depardye ishtirok etgan "Ipak yo‘li" hujjatli filmi suratga olingan.