Kurash bo‘yicha jahon chempioni Prezidentdan xonadon sovg‘a sifatida oldi

Jahon chempionatida oltin medalni qo‘lga kiritgan yunon-rum kurashchisi Aytjan Xalmaxanov O‘zbekiston Prezidenti nomidan uch xonali xonadon sovg‘asini oldi. Bu mukofot uning tarixiy yutug‘i - O‘zbekiston vakilining ushbu sport turida 24 yil ichida jahon birinchiligidagi ilk g‘alabasining e’tirofi bo‘ldi.

Toshkent viloyatining Nurafshon shahrida joylashgan "Nurafshon-siti" turar-joy majmuasidagi yangi xonadon kalitlarini chempionga viloyat hokimi Zoyir Mirzayev topshirdi. Marosim davomida davlat xalqaro maydonda yuksak natijalarga erishayotgan va tengdoshlariga o‘rnak bo‘layotgan yoshlarni munosib rag‘batlantirishi ta’kidlandi.

"Bizning yosh sportchimiz mislsiz qat’iyat va g‘ayrat bilan mamlakatimiz sharafini xalqaro maydonda himoya qilmoqda va yuksak maqsadlar sari intilib, ibrat namunasi bo‘lmoqda", - deya ta’kidladi viloyat rahbari.

Xalmaxanovning zafari Xorvatiyaning Zagreb shahrida bo‘lib o‘tgan jahon chempionatida yuz berdi. 63 kilogrammgacha bo‘lgan vazn toifasida ishtirok etgan 19 yoshli sportchi final bahsida Koreya Respublikasi vakili Chung Xan-Jeni ishonchli tarzda mag‘lub etdi. O‘zbekistonlik yunon-rum kurashchisi oxirgi marta 2001-yilda jahon chempionati shohsupasining eng yuqori pog‘onasiga ko‘tarilgan edi.

Bu g‘alaba O‘zbekiston sport jamoatchiligi uchun muhim voqea bo‘lib, mamlakatimiz kurash maktabining yuksak salohiyatini tasdiqladi. Bir oy avval U-20 yoshlar o‘rtasidagi jahon chempionatida g‘olib chiqqan Xalmaxanovning muvaffaqiyatli ishtiroki mamlakatda avlodlar davomiyligi va sportchilarni tayyorlash tizimining samaradorligidan dalolat beradi. Yunon-rum kurashi bo‘yicha O‘zbekiston terma jamoasi yakunlangan jahon birinchiligida umumjamoa hisobida uchinchi o‘rinni egalladi.

Yunon-rum kurashi, erkin kurashdan farqli o‘laroq, beldan pastki qismini ushlashni, shuningdek, har qanday harakatlarni (oyoq bilan chalish, ilintirish, to‘siq qo‘yish) bajarish uchun oyoqlardan foydalanishni taqiqlaydi. Barcha usullar qo‘llar va tananing yuqori qismi yordamida amalga oshiriladi.