O‘zbekiston va Ozarbayjon JCh-2027 (U-20) mezboni sifatida tasdiqlandi

Xalqaro futbol federatsiyasi (FIFA) Ijroiya qo‘mitasi 2027 yilda 20 yoshgacha bo‘lgan yoshlar jamoalari o‘rtasidagi futbol bo‘yicha Jahon chempionatini o‘tkazish uchun O‘zbekiston va Ozarbayjonning qo‘shma arizasini rasman tasdiqladi. Bu qaror turnir tarixida ilk bor ikki xil konfederatsiya - Osiyo va Yevropaga a’zo bo‘lgan ikki mamlakat tomonidan tashkil etilishini anglatadi.

FIFA prezidenti Janni Infantino har ikki mamlakatni tabriklab, ularning katta hissasi va futbolga bo‘lgan ishtiyoqini qayd etdi. "Ozarbayjon va O‘zbekistonni, odamlari chin dildan futbolni sevadigan ikki ajoyib mamlakatni tabriklayman", - dedi Infantino. U har ikki assotsiatsiya yirik miqyosdagi tadbirlarni tashkil etish uchun zarur tajribaga ega ekanligini ta’kidladi.

O‘z izohida FIFA rahbari Ozarbayjonning 17 yoshgacha bo‘lgan qizlar o‘rtasidagi futbol bo‘yicha Jahon chempionatini muvaffaqiyatli o‘tkazganini, shuningdek, O‘zbekistonning 2024 yilda futzal bo‘yicha Jahon chempionatini tashkil etgani uchun yuqori baho olganini eslatib o‘tdi. "Bizni bu ikki mamlakatning davlat rahbarlari va futbol muxlislari qo‘llab-quvvatlamoqda", - deya qo‘shimcha qildi Infantino, loyihaning hukumat va jamoatchilik tomonidan mustahkam qo‘llab-quvvatlanayotganini ko‘rsatib.

Kattalar o‘rtasidagi Jahon chempionatidan keyin FIFA shafeligidagi eng nufuzli ikkinchi turnir hisoblangan U-20 Mundialining o‘tkazilishi mintaqada futbolni yanada rivojlantirish uchun muhim katalizator sifatida ko‘rilmoqda. FIFA prezidentining so‘zlariga ko‘ra, bo‘lajak chempionat "ikkala qit’amizda, ham Yevropada, ham Osiyoda futbol rivojiga hissa qo‘shadi". Bu tarixiy voqea nafaqat O‘zbekiston va Ozarbayjonga o‘z tashkilotchilik salohiyati va mehmondo‘stligini namoyish etish imkoniyatini beradi, balki Yevropa va Osiyo o‘rtasidagi sport aloqalarini mustahkamlashda muhim bosqich bo‘lib xizmat qiladi.

U-20 Jahon chempionati ko‘plab kelajakdagi jahon futbol yulduzlari uchun tramplin vazifasini o‘taydi. O‘z vaqtida bu turnirda Diego Maradona, Lionel Messi, Pol Pogba va Erling Holand kabi futbolchilar porlagan.