2025-yilning eng badavlat futbolchilari o‘nligiga kimlar kirdi?

Amerikaning Forbes moliyaviy-iqtisodiy jurnali tomonidan e’lon qilingan yillik reytingga ko‘ra, Saudiya Arabistonining "An-Nassr" futbol klubi hujumchisi Krishtianu Ronaldu 2025-yilda sayyoramizning eng ko‘p maosh oladigan futbolchisi deb tan olindi. Nashr tahlilchilari yetakchi o‘yinchilarning daromadlarini kompleks baholashdi, bu an’anaviy tarzda nafaqat shartnomalar bo‘yicha ish haqi va bonuslarni, balki futbol maydonidan tashqaridagi tijorat faoliyatidan tushgan daromadlarni ham o‘z ichiga oladi.

Portugaliyalik hujumchining joriy yildagi umumiy daromadi 280 million dollarga baholanmoqda. Bu summaning asosiy qismi, ya’ni 230 millioni, uning Saudiya klubidagi o‘yin faoliyatiga to‘g‘ri keladi, qolgan 50 million esa ko‘plab homiylik shartnomalari va turli tadbirlarda ishtirok etish orqali olingan.

Ushbu nufuzli ro‘yxatda ikkinchi o‘rinni Amerikaning "Inter Mayami" klubida to‘p surayotgan argentinalik Lionel Messi egalladi. Uning yillik umumiy daromadi 130 million dollarni tashkil etdi, shundan 60 millioni - maydondagi maoshi, 70 millioni esa - o‘yindan tashqari faoliyatdan olingan daromadlardir. Kuchli uchlikni Saudiya Arabistonining "Al-Ittihod" jamoasi sharafini himoya qilayotgan fransiyalik hujumchi Karim Benzema yakunlab berdi. Uning yillik daromadi 104 million dollarga yetdi (100 million klubdan va 4 million tijoratdan).

Birinchi o‘nlikdagi keyingi o‘rinlar taqsimoti yetakchi Yevropa klublari va Saudiya ligasining moliyaviy qudratini namoyish etadi. Xususan, Madridning "Real" klubidan bir yo‘la uch nafar futbolchi ro‘yxatdan joy olgan:

Kilian Mbappe, uning umumiy daromadi 95 million dollarni (70+25) tashkil etdi.
Vinisius Junior 60 million (40+20) daromad bilan.
Jud Bellingem 44 million (29+15) ishlab topdi.

Reytingda Angliya Premyer-ligasini "Manchester Siti"dan Erling Holand (daromadi 80 millionga yetdi (60+20)) va "Liverpul"dan Mohamed Salah (55 million (35+20)) himoya qilmoqda. Ronalduning "An-Nassr"dagi jamoadoshi Sadio Mane 54 million dollar (50+4) bilan sakkizinchi pog‘onada joylashdi. "Barselona"ning yosh iqtidori Lamin Yamalning ro‘yxatda paydo bo‘lishi diqqatga sazovordir, uning 43 millionlik (33+10) daromadi o‘ninchi o‘rinni egallashiga imkon berdi.

Forbes hisob-kitoblariga ko‘ra, 2025-yilda dunyoning eng ko‘p maosh oladigan o‘n nafar futbolchisining umumiy daromadi 945 million dollarga yetdi.