Bezos va Altman Turinda SI bozoridagi "pufak" haqida ogohlantirmoqda

Amazon asoschisi Jeff Bezos sun’iy intellekt (SI) sohasidagi joriy investitsion yuksalishni o‘tmishdagi moliyaviy "pufak"lar bilan qiyosladi, biroq yakuniy natija jamiyat uchun sezilarli foyda keltirishini ta’kidladi. Turindagi Italiya texnologiyalar haftaligida so‘zga chiqqan Bezos, investorlar uchun yo‘qotishlar ehtimoliga qaramay, texnologiyaning yutuq salohiyati shubhasiz ekanligini bildirdi.

Bezosning so‘zlariga ko‘ra, SIga nisbatan hozirgi yuksak ishtiyoq muhiti bu sohadagi deyarli barcha loyihalarning - istiqbollisi ham, muvaffaqiyatsizligi aniq bo‘lganlari ham - moliyalashtirilishiga olib kelmoqda. "Odamlar bugungidek sun’iy intellektdan hayajonlangan bir paytda, har bir tajriba, har bir kompaniya - yaxshi g‘oyalar ham, yomon g‘oyalar ham - moliyalashtirilmoqda", - dedi tadbirkor. Uning fikricha, bunday vaziyat investorlar uchun hayotiy biznes-modellarni spekulyativ tashabbuslardan ajratib olishni ancha qiyinlashtiradi.

Tarixiy misol sifatida Bezos 1990-yillardagi biotexnologiya sanoati atrofidagi investitsion shov-shuvni keltirdi. O‘shanda ko‘plab kompaniyalar bankrot bo‘lgan va investorlar katta mablag’ yo‘qotgan, ammo bu davr natijasida bir nechta hayotiy muhim dorilar yaratilgan. Bezos sun’iy intellekt bilan ham shunga o‘xshash stsenariy yuz berishiga ishonadi: "chang bosilgach", jamiyat amalga oshgan ixtirolardan ulkan foyda oladi. Xatarlarga qaramay, SI har bir sohani tubdan o‘zgartiradi va butun dunyodagi kompaniyalarning unumdorligini oshiradi.

OpenAI rahbari Sem Altman ham xuddi shunday fikrda bo‘lib, u ham avvalroq SI bozorida "pufak" belgilari mavjudligi haqida gapirib, uni dotkomlar bumi bilan taqqoslagan edi. Altman, texnologiyaning o‘zi ulkan salohiyatga ega bo‘lsa-da, investorlarning hissiy hayajoni ko‘plab startaplarning haddan tashqari yuqori baholanishiga olib kelishini ta’kidlagan.

Ushbu munozaralar fonida sun’iy intellekt infratuzilmasiga investitsiyalar o‘sishda davom etmoqda. Bloomberg ta’kidlashicha, yuqori qiziqish nafaqat SI ishlab chiquvchilariga, balki chiplar yetkazib beruvchi va ma’lumotlar markazlarini quruvchi kompaniyalarga ham kuzatilmoqda. Bunga yorqin misol sifatida BlackRock investitsiya kompaniyasining Aligned Data Centers ma’lumotlar markazi operatorini sotib olish niyatini keltirish mumkin. Bitim qiymati 40 mlrd dollarga baholanmoqda. Aligned Data Centers boshqaruvida AQSh va Janubiy Amerikada 70 dan ortiq ma’lumotlar markazi va 50 ta kampus mavjud bo‘lib, joriy yil boshida kompaniya 12 mlrd dollardan ortiq mablag’ jalb qilgan edi.

Bugungi kundagi eng kuchli til modellaridan biri bo‘lgan OpenAI’ning GPT-4’ni o‘qitish uchun, turli hisob-kitoblarga ko‘ra, bir necha ming xonadonning yillik iste’moliga teng miqdorda elektr energiyasi sarflangan. Bu zamonaviy SI tizimlarini rivojlantirish qanchalik ko‘p resurs talab qilishini va nima uchun infratuzilmaga, jumladan, ma’lumotlar markazlariga investitsiyalar muhimligini ko‘rsatadi.