Yuzlab sayyohlar Everestda qor bo‘roni tufayli qolib ketishdi

So‘nggi yillardagi eng kuchli qor yog‘ishi natijasida Tibetdagi Everest tog‘i yonbag‘irlarida sayyohlar va alpinistlarni o‘z ichiga olgan mingga yaqin odam qolib ketdi. 3-oktabr kuni mintaqada boshlangan tabiiy ofat asosiy yo‘nalishlarda harakatni to‘liq to‘xtatib qo‘ydi.

Odamlar guruhlari dengiz sathidan 4900 metrdan ortiq balandlikdagi lagerlarda joylashgan. To‘xtovsiz yog‘ingarchilik va kuchli shamol chodirlarning bir qismini shikastlanishiga olib keldi va ba’zi joylarda qor qoplami hatto yuk hayvonlari, masalan, qo‘toslarning harakatlanishini imkonsiz qilib qo‘ydi. Guvohlarning so‘zlariga ko‘ra, alohida uchastkalarda ko‘rish masofasi deyarli nolga tushib qolgan.

Mintaqa hukumati 4-oktabrdan boshlab Everest sayyohlik zonasiga kirishni yopishga majbur bo‘ldi va bu hududga sayohat qilishdan saqlanishni qat’iy tavsiya qildi.

Qutqaruv ishlarini olib borish uchun professional yo‘lboshchilar va mahalliy aholini o‘z ichiga olgan yuzlab odamlar safarbar qilindi. Evakuatsiya operatsiyasi beqaror aloqa va yo‘llarni to‘sib qo‘ygan chuqur qor uyumlari tufayli sezilarli darajada murakkablashmoqda. Xitoy markaziy televideniyesining so‘nggi ma’lumotlariga ko‘ra, qutqaruvchilar allaqachon 350 kishini tog‘dan xavfsiz olib tushishga muvaffaq bo‘lishdi. Yana 200 nafar sayyoh bilan aloqa o‘rnatilgani ham xabar qilingan.

Xitoyning "Jimu Xinwen" axborot platformasi gipotermiya alomatlari bo‘lgan jabrlanganlar borligi, ularning ba’zilari og‘ir ahvolda ekanligi haqida ma’lumot tarqatdi. Biroq, hozirgi vaqtda Everest yonbag‘irlarida qolib ketganlar orasida halok bo‘lganlar to‘g‘risidagi ma’lumotlarning rasmiy tasdig‘i kelib tushmagan.

Shu bilan birga, noqulay ob-havo sharoiti qo‘shni Nepalda fojia sabab bo‘ldi. 3-oktabrdan beri mamlakatda kuchli yomg‘ir va ular keltirib chiqargan suv toshqinlari va ko‘chkilar natijasida kamida 47 kishi halok bo‘ldi.

Everest tog‘i, shuningdek, Jomolungma nomi bilan ham tanilgan, dunyodagi eng baland cho‘qqi bo‘lib, uning balandligi dengiz sathidan 8849 metrdan ortiqni tashkil etadi.