AQSh Rossiya neft-gaz sektoriga qarshi sanksiyalarni kengaytirdi

Prezident Donald Tramp ma’muriyati Moskavaga iqtisodiy bosimni kuchaytirish yo‘lida muhim qadam tashlab, Rossiyaning yetakchi energetika kompaniyalari - "Rosneft" va "LUKOIL"ga qarshi cheklov choralari paketini joriy qildi. Trampning ikkinchi prezidentlik muddati doirasidagi ilk bunday qaror Rossiya byudjetining asosiy daromad manbalariga qaratilgan.

AQSh Moliya vazirligi o‘z rasmiy bayonotida ushbu choralar Rossiya tomonidan "Ukrainadagi mojaroga chek qo‘yish uchun tinchlik jarayoniga jiddiy sodiqlikning yo‘qligiga" javoban qabul qilinganini tushuntirdi. Xorijiy aktivlarni nazorat qilish boshqarmasi (OFAC) sanksiyalar ro‘yxatiga nafaqat kompaniyalarning o‘zini, balki ularning ustav kapitalida 50% dan ortiq ulushga ega bo‘lgan 34 ta sho‘ba korxonasini ham kiritdi. Ro‘yxatdan muhim infratuzilma obyektlari, jumladan, sakkizta neftni qayta ishlash zavodi va yigirma beshta qazib oluvchi korxona o‘rin olgan.

Amerika moliya idorasi rahbari Skott Bessent vaziyatni izohlar ekan, sanksiyalarni bevosita Rossiya rahbariyatining pozitsiyasi bilan bog‘ladi. "Prezident Putinning ma’nosiz urushni to‘xtatishni istamagani sababli, Moliya vazirligi Kremlning harbiy mashinasini moliyalashtirayotgan Rossiyaning ikki yirik neft kompaniyasiga nisbatan sanksiyalar qo‘llamoqda", - dedi Bessent. U, shuningdek, idora prezident Trampning mojarolarni hal qilish borasidagi sa’y-harakatlarini qo‘llab-quvvatlash uchun keyingi choralarni ko‘rishga tayyorligini ta’kidladi.

Yangi cheklovlar ko‘rsatilgan kompaniyalarning Qo‘shma Shtatlar yurisdiksiyasidagi barcha aktivlari va aktivlardagi ulushlarini xatlab qo‘yishni nazarda tutadi. Shu bilan birga, Moliya vazirligi ishbilarmonlik munosabatlarini tugatish tartibini belgilovchi umumiy litsenziyalarni chiqardi. Unga ko‘ra, "Rosneft", "LUKOIL" va ularning sho‘ba korxonalari bilan barcha moliyaviy operatsiyalarni yakunlash uchun 21-noyabrgacha muddat berildi. Shu bilan birga, "LUKOIL" uchun alohida istisno qilindi: Amerika kompaniyalariga 22-noyabrgacha kompaniyaning xorijdagi obyektlarida tovar va xizmatlar sotib olishga ruxsat etildi.

Ushbu choralar avvalgi ma’muriyat tomonidan boshlangan sanksiyalar siyosatining davomidir. Joriy yilning yanvar oyida, Jo Baydenning prezidentlik muddati tugashidan biroz oldin, "Gazprom neft" va "Surgutneftegaz"ga qarshi cheklovlar joriy etilgan edi. O‘shanda, shuningdek, "LUKOIL" rahbariyati vakillari - bosh direktor Vadim Vorobyov va kompaniyaning eng yirik aksiyadori o‘g‘li Yusuf Alekperov ham individual sanksiyalarga uchragan edi.