Yevropa yo‘nalishi - O‘zbekistondan sayohatlarga talab 38 foizga oshdi

2025-yil boshidan O‘zbekiston fuqarolarining Yevropa mamlakatlariga sayohat qilishga bo‘lgan qiziqishi sezilarli darajada oshgani kuzatilmoqda. Aviasales Uzbekistan tomonidan taqdim etilgan ma’lumotlarga ko‘ra, joriy yilning dastlabki uch choragida Yevropaga bron qilingan aviachiptalar soni o‘tgan yilning shu davriga nisbatan 38 foizga oshgan.

Statistik tahlillar shuni ko‘rsatadiki, sayohatlarning o‘zida ham o‘zgarishlar mavjud. Yevropada bo‘lishning o‘rtacha davomiyligi 19 kungacha uzaygan. Bundan tashqari, bolalar ishtirokidagi sayohatlar ulushi 7 foizga oshgan, bu Yevropa yo‘nalishlarining oilaviy hordiq uchun tobora ommalashib borayotganidan dalolat beradi. E’tiborlisi, talabning o-shishi fonida aviachiptalarning o‘rtacha narxi 6,6 foizga pasaygan.

Parvozlar geografiyasi G‘arbiy va Sharqiy Yevropani qamrab oladi. Eng ko‘p talab qilinadigan shaharlar ro‘yxatiga Riga, Frankfurt, Vilnyus, Berlin va Varshava kirdi. Ushbu beshta yo‘nalish barcha rasmiylashtirilgan bronlarning deyarli yarmini tashkil etadi. Shuningdek, yetakchilar o‘ntaligiga Myunxen, Vena, Parij, Budapesht va Praga ham kiritilgan.

Tahlilchilar Boltiqbo‘yi mamlakatlariga alohida e’tibor qaratmoqdalar. Rigaga aviachiptalarga bo‘lgan talab 63 foizga oshgan bo‘lsa, Vilnyusga bron qilishlar soni 39 foizga ko‘paygan. Mutaxassislar bu tendentsiyani nafaqat sayyohlik qiziqishi bilan bog‘lashmoqda. O‘zbekiston Markaziy banki ma’lumotlari iqtisodiy aloqalarning mustahkamlanayotganini tasdiqlaydi: 2025-yilning ikkinchi choragida Latviya, Litva va Estoniyadan pul o‘tkazmalari hajmi yillik hisobda 65,6 foizga o‘sgan.

"Biz Riga va Vilnyusga bo‘lgan qiziqishning ortishi nafaqat turizm bilan bog‘liqligini qayd etmoqdamiz. Tobora ko‘proq vatandoshlarimiz u yerga ish yuzasidan, ta’lim olish, ishlash yoki oilasi bilan birlashish uchun yo‘l olmoqda", - deya vaziyatni izohladi Aviasales’ning O‘zbekistondagi mamlakat menejeri Ruslan Bayganurov.

Shu bilan birga, Germaniya O‘zbekistondan umumiy bron qilishlar soni bo‘yicha yetakchilik mavqeini saqlab qolmoqda. Ayni paytda eng qimmat yo‘nalish Parij bo‘lib qolmoqda, u narxlarga qaramay, tobora ko‘proq oilaviy sayohatchilarni jalb qilmoqda. Umuman olganda, talab o‘sishining asosiy yo‘nalishi Sharqiy Yevropa va Boltiqbo‘yi mintaqasi mamlakatlari tomon siljimoqda.

2004-yilda yo‘lga qo‘yilgan Toshkent va Riga o‘rtasidagi to‘g‘ridan-to‘g‘ri havo qatnovi Markaziy Osiyoni Boltiqbo‘yi mamlakatlari bilan bog‘laydigan yagona to‘g‘ridan-to‘g‘ri marshrut bo‘lib, bu ham sayyohlik, ham ishbilarmonlik aloqalarining rivojlanishiga sezilarli hissa qo‘shmoqda.