Markaziy Osiyo orqali yangi savdo yo‘li ishga tushirildi

To‘rtta Markaziy Osiyo davlati Xitoy bilan hamkorlikda yangi xalqaro multimodal yuk tashish yo‘nalishini ishga tushirdi. Loyihaning boshlanishini bildiruvchi tantanali marosim 15-oktabr kuni Qashg‘arda bo‘lib o‘tdi va u yerdan tovarlarning birinchi partiyasi Xitoy-Qirg‘iziston chegarasi tomon yo‘l oldi. Bu qadam mintaqa transport infratuzilmasini rivojlantirish va savdo aloqalarini mustahkamlashda muhim bosqich sifatida baholanmoqda.

Yoritish uskunalari, mexanik buyumlar va xalq iste’moli mollari ortilgan yettita yuk mashinasi Qashg‘ardan chiqib, yangi yo‘lak bo‘ylab o‘z yo‘lini boshladi. Loyihaga ko‘ra, yuklarni butun marshrut bo‘ylab yetkazib berish muddati to‘qqiz kunni tashkil etadi. Transport vositalarining O‘zbekiston hududiga 21-oktabrda yetib kelishi, Turkmanistondagi so‘nggi manzilga esa 24-oktabrda yetib borishi kutilmoqda.

Yo‘nalish bir nechta transport turlarini o‘z ichiga olgan murakkab logistika zanjiridan iborat. Dastlab tovarlar Xitoyning Sian va Chendu kabi yirik sanoat markazlaridan Qashg‘argacha temir yo‘l orqali yetkaziladi. Keyin avtotransport Qirg‘iziston orqali O‘sh shahriga boradi va u yerda mahsulotlar yana temir yo‘l tarkiblariga ortiladi. Yukning asosiy qismi uchun oxirgi manzil Kaspiy dengizidagi Turkmanboshi porti bo‘ladi.

Yangi yo‘lakning muhim xususiyati uning keyingi tarmoqlanishidir. Turkmanboshidan yuklarning bir qismi dengiz yo‘li bilan Kaspiy orqali Ozarbayjonga jo‘natiladi, bu esa Janubiy Kavkaz mamlakatlari bozorlariga to‘g‘ridan-to‘g‘ri chiqish imkonini beradi.

Ushbu yo‘nalishning ishga tushirilishi Xitoy, Markaziy Osiyo va Yevropa o‘rtasidagi transport oqimlarini diversifikatsiya qilishga qaratilgan strategik muhim qarordir. U, shuningdek, "O‘rta yo‘lak" deb ataladigan tranzit salohiyatini rivojlantirish bo‘yicha kengroq strategiyaga integratsiya qilingan.

XXR Transport vazirligi transport xizmatlari departamenti rahbari Say Tuanzse ta’kidlaganidek, yo‘lak nafaqat Yevropa bozorlariga, balki Janubiy Osiyo va Yaqin Sharqning istiqbolli bozorlariga chiqish uchun yangi imkoniyatlar yaratadi. Uning so‘zlariga ko‘ra, ushbu loyiha "Bir kamar, bir yo‘l" global tashabbusini amalga oshirishga yordam beradi va ishtirokchi mamlakatlar o‘rtasidagi yuk tashish hajmining o‘sishini rag‘batlantiradi.

Shuni ta’kidlash kerakki, mintaqada multimodal tashuvlarni rivojlantirish jadal sur’atlar bilan bormoqda. Masalan, sentabr oyida "O‘ztemiryo‘lkonteyner" aksiyadorlik jamiyati Gansu International Logistics Group bilan hamkorlikda O‘zbekiston, Qirg‘iziston va Xitoyni bog‘laydigan yo‘nalishni ishga tushirib, Lanchjou shahriga tarkib jo‘natgan edi.

"O‘rta yo‘lak" (Transkaspiy xalqaro transport yo‘nalishi) Rossiya hududidan o‘tuvchi an’anaviy shimoliy yo‘nalishlarga alternativa bo‘lib, uning rivojlanishi so‘nggi geosiyosiy o‘zgarishlar fonida ayniqsa dolzarb bo‘lib qoldi.