Turkiyada odam savdosi bilan shug‘ullangan "Sonya" laqabli O‘zbekiston fuqarosi qo‘lga olindi

O‘zbekiston Respublikasining Istanbuldagi Bosh konsulligi matbuot xizmati xabar berdi.

Turkiya va O‘zbekiston huquq-tartibot idoralari xodimlari O‘zbekiston fuqarosi, 1974-yilda tug‘ilgan, "Sonya" nomi bilan mashhur Rahmatova Sanobarni qo‘lga oldi. U odam savdosi jinoyatiga aloqadorligi uchun qidiruvga berilgan. U hibsga olinganidan keyin O‘zbekistonga ekstraditsiya qilingan.

U jinoiy guruh tarkibida Bangkokda fohishaxona tashkil etganlikda, mamlakatimizdan ayollarni yuqori maoshli ishlar va’dalari bilan yollaganlikda ayblanmoqda. U ayollarni aldab, ularni jinsiy qullikka majburlagan. Ayol ularni Qozog‘iston orqali Tailandga olib o‘tgan. 2013 yildan 2015 yilgacha jinoiy rejalarini amalga oshirgan.

Istanbuldagi Bosh konsulligi uning noqonuniy xatti-harakatlaridan jabr ko‘rgan fuqarolarni huquq-tartibot idoralari yoki O‘zbekiston Respublikasining Istanbuldagi Bosh konsulligiga murojaat qilishga chaqirdi.