Samarqandlik fuqaro aliment to‘lamagani uchun uchinchi marta sudlanishi mumkin

Farzandiga aliment to‘lashdan bo‘yin tovlayotgan shaxsga nisbatan tegishli choralar ko‘rilmoqda - Samarqand viloyati Majburiy ijro byurosi matbuot xizmati xabar berdi.

Ma’lum qilinishicha, fuqarolik ishlari bo‘yicha Samarqand shahar sudining 2014-yildagi ijro varaqasi asosida Ishtixon tumani Majburiy ijro byurosiga o‘zining ikki voyaga etmagan farzandi uchun aliment undirishni so‘ragan shaxsga nisbatan ish kelib tushgan. Ish jarayonida unga xorijga chiqish taqiqlangan.

Biroq, erkak doimiy ravishda aliment to‘lashdan bo‘yin tovlagan va tegishli ma’muriy jazoga tortilgan. 2015-yilda sud uni O‘zbekiston Respublikasi Jinoyat kodeksining "Voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash" moddasi 1-qismi bilan aybdor deb topib, bir oy muddatga uy qamog‘i jazosini tayinlagan. Shuningdek, sud unga 2 094 277 so‘m miqdoridagi qarzdorlikni undirishga majbur qildi.

Ushbu shaxs jazoni o‘tab bo‘lgach, aliment to‘lashdan bo‘yin tovlashda davom etgan va unga nisbatan O‘zbekiston Respublikasi Jinoyat kodeksining "Voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash" moddasi 2-qismi bilan jinoyat ishi qo‘zg‘atilgan. Unga nisbatan 9 421 825 so‘m qarzni majburiy undirish bilan bir yil olti oy muddatga ozodlikdan mahrum qilish jazosi tayinlandi.

Shundan keyin ham erkak alimentni to‘lamagan va 2019 yilda yana ma’muriy javobgarlikka tortilgan va 15 sutkaga ma’muriy qamoqqa olingan. Keyinchalik qarzdorning qarindoshlari tomonidan 3 997 000 so‘m miqdoridagi qarzning bir qismi to‘langan.

Erkak qolgan 155 587 000 so‘m qarzni to‘lashdan bosh tortgan va unga nisbatan O‘zbekiston Respublikasi Jinoyat kodeksining "Voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash" 1-qismi bilan yana jinoyat ishi qo‘zg‘atilgan. U yana bir yilgacha qamoq jazosiga hukm qilinishi mumkin.