Jizzaxlik erkak aliment to‘lamaslik uchun Samarqandga qochib ketgan

Qochqin shaxs topildi - Jizzax viloyati Majburiy ijro byurosi matbuot xizmati xabar berdi.

Zarbdor tumani Majburiy ijro byurosi xodimlari voyaga yetmagan farzandlari uchun aliment to‘lashdan bo‘yin tovlab kelgan shaxsni qidiruvga berilgan. Byuro xodimlari tomonidan o‘tkazilgan tezkor-qidiruv tadbirlari natijasida uni Samarqand viloyati Bulung‘ur tumanida noqonuniy ravishda tom yopish ishlari bilan shug‘ullanayotganligi aniqlangan. U umumiy ishchi bo‘lib ishlagan.

Ko‘rilgan choralar natijasida ushbu shaxs Zarbdor tumani Majburiy ijro byurosiga olib borilib, unga nisbatan O‘zbekiston Respublikasining Ma’muriy javobgarlik to‘g‘risidagi kodeksining "Voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash" moddasi bilan ma’muriy bayonnoma rasmiylashtirildi. Agar u 19 million so‘mlik qarzni to‘lamasa, ma’muriy qamoqqa olinadi. Ish jinoyat ishlari bo‘yicha Zarbdor tuman sudi tomonidan ko‘rib chiqiladi.

Ta’kidlanishicha, agar erkak ma’muriy jazoga tortilganidan keyin ham aliment to‘lashdan bo‘yin tovlashda davom etsa, O‘zbekiston Respublikasi Jinoyat kodeksining "Voyaga yetmagan yoki mehnatga layoqatsiz shaxslarni moddiy ta’minlashdan bo‘yin tovlash" moddasi bo‘yicha jinoiy javobgarlikka tortilib, bir yilgacha ozodlikdan mahrum qilish bilan jazolanadi.