Surbet fotograflar Toshkentning obro‘sini tushirmoqda

Fotograflar Toshkent shahridagi savdo-ko‘ngilochar markazlarga tashrif buyuruvchilarni qo‘rqitmoqda - UPL muxbiri xabar berdi.

Toshkent shahridagi savdo-ko‘ngilochar markazlarda o‘zini tutmaydigan, ruxsatsiz suratga olayotgan fotograflar soni ortib bormoqda. Oddiy oilaviy sayr chog‘ida, kundalik muammolardan hordiq chiqarish o‘rniga, tashrif buyuruvchilar o‘zlariga yoqimsiz xizmat takliflariga duch kelmoqda. Bunday holatlar har qanday jamoat joyi - madaniyat va dam olish bog‘i yoki savdo-ko‘ngilochar markaz - haqidagi taassurotni buzishi mumkin. Bundan tashqari, bu kabi xatti-harakatlar shaxsiy hayotiga qo‘pol aralashuvlarga o‘rganmagan xorijiy sayyohlarni ham bezovta qilishi mumkin.

Masalan, High Town Mall savdo-ko‘ngilochar markazining eng yuqori qavatida, "qaroqchilar kemasi" atraksioniga yetmasdan, bir nechta fotograf tashrif buyuruvchilarni ruxsatsiz suratga oladi va darhol tayyor suratlarni chop etish xizmatini taklif qiladi. Biroq bu - eng katta muammo emas.

Bolalar maydonchasida ham xuddi shunday holat kuzatiladi. Bolalar ota-onalarining ruxsatisiz suratga olinadi, so‘ng esa ushbu surat asosida magnit yoki krujka ko‘rinishidagi suvenir mahsulotlarini sotib olish taklif etiladi. Ayrim hollarda fotograf bolalarni deyarli ta’qib qilib yuradi - bola chiqish tomon yo‘nalgan zahoti, u orqasidan yugurib, ota-onasiga xizmatini taklif qiladi.

Bizning muxbirimiz tajriba o‘tkazib, ikki farzandining suratlari tushirilgan magnitlarni xarid qildi. Har bir magnitning narxi 60 ming so‘mni tashkil etdi. Keyinroq u bolalarini maydonchadan olib ketishga borganda, boshqa bir fotograf unga murojaat qilib, go‘yoki bolalar krujka uchun suratga tushishni so‘rashganini aytdi. Bunday krujkalarning narxi esa 100 ming so‘mni tashkil etadi. Ya’ni, bu joyda mijozlarga keraksiz xizmat va mahsulotlarni majburlab sotish holatlari chegarasiz darajaga yetgan. Hatto, krujkani olishga rozi bo‘lgan mijozga keyinroq yanada qimmatroq mahsulot taklif qilinishi ham mumkin.

UPL tahririyati umid bildiradiki, bezbet fotograflar bilan bog‘liq vaziyatni tegishli idoralar, shuningdek savdo-ko‘ngilochar markazlar va madaniyat hamda dam olish bog‘lari ma’muriyatlari nazoratga oladi.

Eslatib o‘tamiz, O‘zbekiston hududida fuqarolarni hamda ularning farzandlarini suratga yoki videoga olish uchun ruxsat olishni majburiy etuvchi normativ-huquqiy hujjat qabul qilinishi rejalashtirilgan. Ushbu hujjat, ehtimol, bunday surbet fotograflarning faoliyatiga cheklov qo‘yib, ularning haddidan oshgan xatti-harakatlarini jilovlashga yordam beradi.